Чистење

И да немате време за ништо друго, мора да си ја чистите кожата. Не грижете се, чистење е само модерен збор за миење лице. Ова треба да се прави секое утро и секоја вечер пред спиење. Тоа што не се гледаат нечистотиите на лицето не значи дека ги нема. Размислете само на што сè сте изложени секој ден: загадување, издувни гасови од автомобилите, чад од цигари, дури и освежувачи на простории (Rembiesa, Ruzgas, Engblom, & Holefors, 2018). Сите овие ситни честички се лепат на кожата, па затоа мора да се измијат.

Е сега, ова не значи дека треба да го користите стариот, сув сапун. Обичните сапуни најчесто содржат многу детергенти и дезодоранси и може да се многу груби и да ја дехидрираат кожата. Она што ви треба е добро средство за чистење лице. Мажите најчесто имаат помрсна кожа од жените (Rahrovan, Fanian, Mehryan, Humbert, & Firooz, 2018), па затоа за најдобар резултат треба да користат средство за чистење лице наменето за нормална до мрсна кожа. Запомнете, ако не ја чистите кожата секој ден, ќе имате затнати пори и акни од вишокот нечистотии и маснотии.

Практикувајте интервалско вежбање

Го обожавам интервалското вежбање поради ефектите на согорување масти по вежбање. За време на интервалско вежбање со висок интензитет телото користи јаглехидрати како извор на гориво и согорува масти за да се опорави. Интервалското вежбање е најефикасен начин на вежбање од временска гледна точка и со него се постигнуваат неверојатни резултати во однос на согорување масти по само 30 минути вежбање, затоа практикувајте го овој начин на вежбање двапати неделно (Abbasi, 2019; Gillen & Gibala, 2014; Skelly et al., 2014).

Третман

Меѓу првите места на кои почнуваме да ги забележуваме првите знаци на стареење е пределот околу очите. И, за жал, ова е местото што многу од мажите го запоставуваат. Кожата околу очите нема толку потни и лојни жлезди и затоа е многу често подложна на дехидрација и на појава на линии и брчки. На меката и тенка кожа во пределот околу очите може да се појават ситни линии што брзо ќе прераснат во брчки. Што треба да направите? Веднаш одберете си хидрантен крем за пределот околу очите. За да имате ефект, треба само да намачкате малку од производот под и околу очите. Тоа ќе помогне кожата да ви биде хидрирана, мазна и заштитена секој ден. Нанесувајте крем за пределот околу очите наутро, навечер пред спиење и по чистење на лицето.

Одржување на влажноста

Хидрантните кремови може да направат голема разлика во изгледот на кожата кај мажите. Всушност на мажите дури и повеќе им треба хидрантен крем отколку на жените. Причината за ова е што мажите се бричат. Со секој потег на бричот не само што ја бричите брадата туку ги отстранувате и есенцијалните масла од кожата. И, што правите потоа? Веројатно ставате лосион по бричење на база на алкохол што ја гори кожата. Тогаш алкохолот уште повеќе ја дехидрира кожата. Со што треба да го замените лосионот? Со хидрантен крем. Изберете хидрантен крем со SPF што ќе ве заштити и од најмала изложеност како и од штетните зраци на сонцето. Ако не се заштитите од изложеноста на сонце, тоа може да доведе до стареење на кожата, линии, брчки и, најлошо од сè, до рак на кожата.

Господа, гледате колку е едноставно. Ако си ги додадете овие три едноставни чекори во секојдневниот режим, дефинитивно ќе забележите разлика во изгледот. Така на едноставен начин ќе имате здрава, убава кожа.

Референци:  

Abbasi, J. (2019). For Fat Burning, Interval Training Beats Continuous Exercise. Jama, 321(22), 2151-2152. doi:10.1001/jama.2019.4607

Gillen, J. B., & Gibala, M. J. (2014). Is high-intensity interval training a time-efficient exercise strategy to improve health and fitness? Appl Physiol Nutr Metab, 39(3), 409-412. doi:10.1139/apnm-2013-0187

Rahrovan, S., Fanian, F., Mehryan, P., Humbert, P., & Firooz, A. (2018). Male versus female skin: What dermatologists and cosmeticians should know. International journal of women's dermatology, 4(3), 122-130. doi:10.1016/j.ijwd.2018.03.002

Rembiesa, J., Ruzgas, T., Engblom, J., & Holefors, A. (2018). The Impact of Pollution on Skin and Proper Efficacy Testing for Anti-Pollution Claims. Cosmetics, 5(1), 4. 

Skelly, L. E., Andrews, P. C., Gillen, J. B., Martin, B. J., Percival, M. E., & Gibala, M. J. (2014). High-intensity interval exercise induces 24-h energy expenditure similar to traditional endurance exercise despite reduced time commitment. Appl Physiol Nutr Metab, 39(7), 845-848. doi:10.1139/apnm-2013-0562